CIRCUITIONES Equitum

CIRCUITIONES Equitum

ad explorandas visendasque vigilias, indigitantur Papinio Statio, Theb. l. 10. v. 387.

----- ----- monitu Ducis acer agebat

Amphion equites, noctem, vigilataque castra

Explorare datus, primusque per avia campi

Usque procul (nec dum totas lux solverat umbras)

Nescio quid visu dubium, incertumque moveri

Corporaque ire videt. Subitus mox fraude repertâ

Exclamat: cohibete gradum quicumque, sed hostes

Esse patet. Miseri pergunt anteire, timentque

Non sibi, tunc mortem trepidis minitatur, et hastam

Expulit etc. ----- -----

De quibus vide Iustum Lipsium, de Militia Rom. l. 5. c. 9. Apud Athenienses olim, ab anno 18. ad vicesimum usque, quilibet Ephebus cogebatur, περιπολεῖν, circumire excubando seu custodire, τὰ περὶ πόλιν φρούρια, urbana et suburbana castella, lege Solonis, cuius meminit Ulpianus, ad Olynthiac. 3. quô fine accipiebat a Populo pro contione scutum et hastam, uti discimus ex Aristotele de

Atheniensium Republ. Hinc Terentius in Eunucho, Actu 2. sc. 2. v. 58. de Chaerea adolescentulo,

Sed video herilem filium minorem huc advenire,

Miror quid ex Piraeeo abierit: nam ibi custos publice est nunc.

Vide Sam. Petitum, Commentar. in LL. Atticas, l. 8. tit. 1. De Circuitione consimili in Monasteriis, dictum supra in voce Circa. Sed et Circuitio sacer ritus, vide infra Nundinae.